BRIEF. Aan Honoré Lagae. "Ge zijt toch niet malcontent, met da weugelingske?'
Beste Honoré,Nee, ge kent mij niet. En om eerlijk te zijn, ik ken u ook maar uit de 'boekskes', van uw liedjes en van horen zeggen en zien. Curieus gelijk dat ik ben, bennekik vandaag eens gaan kijken naar uw weugelingske. 'k Had daarover gelezen ip het wereldwijde net, da van De Weekbode, de kw.be. Ik laze dat onze volkszanger én -filosoof nu ook een straatnaambord, t.t.z. een wegelnaambord heeft gekregen. Het was, om horen, nen prachtigen avond en ge was gij op 't eind, gelijk of dat we nu van onze provincie moeten zeggen, preus lik fjirtig.
Moa vanuchtend, in de Klein Izegemsestraat. 'k Zag dat de pale met uwe naam er proper geplant staat. Maar dat weugelingske zelve... man-man... ge moet er uw beste kleren niet voor aandoen. 't Zit vul putten, dat weugelingske. En na de bieze van vanochtend stonden ze vul water. Vuil water. Slijk. Ja, 'ik heb thuis nog een vlaag gevangen. Voor mijn vuile schoenen en mijn broekspijpen die van kleur waren veranderd. En van stoffage.
't Staot daor nog een plakkate, dagge met uwen oto nie meugt passeren. Moa ge moet ol nen 4x4 en verzekers nen 8x4 hebb'n om erdeure te keun. Veel passage goa gie doa nie hebb'n, peizekik.
Als gij dat nu ook gezien hebt, zijt gij niet een beetje malcontent? Ik wil maar zeggen... 't is maar een weugelingske vaneigens. En zo helemaal aan 'd achterdeure van Kapelle. 't Is ook een beetje een trekgat als 't waait. Vaneigens, een boulevard hebben we hier op de prochië niet. Een laan wel, maar veel bomen staan er niet en veel 'laan' valt er niet te bezien. En ja, dat was er een voor Boudewijn, onze koning.
Boulevard Debusseré
Moest er ier toch nog ergens twazens nen boulevard komen, dan zou dat miskien wel nen Boulevard Debusseré - ge kent 'm wel, onze burgemeester van vroeger, da was nogal nen kastar - kunnen gedoopt worden. Voor onze andere burgemeester, den dokteur, peize kik meer ip een serviceflattoestand: residentie dokter Carton. Dat zou nog chique klink'n en 't zou passen bij zijn doeninge van vroeger.
Maar gij zijt - ik heb het hier ne keer ipgezocht - toch een uniek geval, Honoré. Er zien nog niet te veel helden van weleer die een weugelingske kriegen. Ge ziet gij verzekers den enigsten. En 't is nog altied beter nen wegel, zegge kik, dan nen wezel. Of dan een van die doodlopende wiekstroaten. Ge zijt gij geen doodlopend stretje, Honoré. Ge zijt gij nog nooit zo onder de levenden geweest gelik de jongste tied.
Tjok- rotonde
'k Peize dat we morgen nog nen nieuwen noame gaan hebben. Ze goan van Tjok Dessauvage, die met zijn potske op zin kop en met zien pott'n, nen ereburger van de prochië moaken. 't Is wel bestid. En ik peize nu - de pott'n van Tjok zijn altied skone rond - dasse trondpunt hier aan 't Smeske nu de Tjok-rotonde goan noemen. Officeel. En datter mettertied miskien een ronde pot van Tjok goat geplaceerd worden.
Reacties
Een reactie posten